il milanese usato in questa pagina risale all\u2019inizio del XX\u00b0 secolo<\/p>\n
Ottone el molla minga el mazz, el cerca de vendicass de v\u00e8ss staa casciaa via da la rocca de Arona e de av\u00e8 ciappaa la p\u00e8ttenada a Angera, su\u2019l Lagh Maggior, dai milanes. Ottone el cova el velen in l\u2019anima, el tira a pr\u00e8ss de la milizia, el ven ben accolt dai comasch, el piomba su Desio, dove lu el gh\u2019aveva di simpatizzant per v\u00e8ss staa l\u00e0 come canonich, e se ne impadroniss in la nott del vint Gennar del 1277. I Torriani, che ona tal sorpresa se la sp\u00e8cciaven propi no, v\u00e8gnen faa presonee e saraa denter in gabbi de f\u00e8rr, confinaa in del cast\u00e8ll Barad\u00e8ll. Ottone Visconti l\u2019entra in Milan, i milanes el ricognossen Signore de\u2019 la cittaa e invochen la paas. El manda a spass tucc e fina el marches de Monferraa, che da lu st\u00e8ss l\u2019era staa el\u00e8tt capitani di milanes, e el ghe toeu la carica per daghela al so nevod Matteo. El marches, ferii in la soa dignitaa, el tenta de reag\u00ec, ma l\u2019\u00e8 ciappaa e saraa su anca lu in d\u2019ona gabbia de f\u00e8rr. Napo Torriani el viv in gabbia on ann e mezz, in che manera l\u2019\u00e8 forse pussee facil immaginall che descrivel. Per\u00f2, cosa l\u2019\u00e8 mai el destin! Napo l\u2019\u00e8 andaa a fen\u00ec i so d\u00ec in di preson del Baradell e propi in la st\u00e8ssa gabbia de f\u00e8rr dove lu l\u2019aveva faa soffr\u00ec Simone da Locarno. Se innalza a Milan, per la prima volta, la bandera cont la vipera e se entra in pieno governo monarchich. Quatter paroll circa l\u2019origin o, per m\u00e8i d\u00ec, la creduda origin di Viscont, me par de fa ben a spendi. Tanti sost\u00e8gnen che i Viscont discenden nientemeno che dai Cesari romani, tanti dai Re
\nLongobardi e di alter da Anchise trojano, ma propi con sicurezza se p\u00f2 no sav\u00e8ll. Per\u00f2 per induzion se po ritegn\u00ec che discenden da on Eriprando, milite in Milan in del 1065 e sc\u00e8pp de vari ramm di Viscont d\u2019Oleggio Castello, di Masino e di Invorio. Bisogna per\u00f2 regordass che\u2019l vocabol \u201cVisconte\u201d el ghe se dava a chii faseva le veci de cont o governator d\u2019ona quai cittaa e l\u2019ha finii poeu, in del secol XI\u00b0, cont el divent\u00e0 cognomm de famili, come precisament la famiglia de Eriprando. Se voeur poeu che on c\u00e8rto Ottone, fioeu de qu\u00e8ll Eriprando l\u00ec, in la prima crociada in Orient, l\u2019av\u00e8ss mazzaa in du\u00e8ll on famoso Saraceno e che ghe sia r\u00e8staa a lu, come trofeo, el scud del Saraceno contrassegnaa cont ona bissa che ten in bocca on bambin cont av\u00e8rt i brasc, che l\u2019\u00e8 poeu diventea el st\u00e8mma gentilizzi di Viscont. Qu\u00e8ll che podi diff l\u2019\u00e8 che anca i Viscont, prima de la nomina de Ottone a Arciv\u00e8scov, gh\u2019aveven minga tant de sfoj\u00e0 verz, come se dis, perch\u00e8 tutt se limitava a on quai fondo che possedeven in su\u2019l Lagh Maggior, ma dopo!… Ve basta d\u00ec che in men d\u2019on secol, la famiglia di Viscont, l\u2019\u00e8 minga dom\u00e0 sovrana de la soa patria, ma de trentacinqu cittaa e l\u2019aspirava anca al regno d\u2019Italia. S\u00ec, va ben, ma se voo avanti a cent ann per volta la st\u00f2ria de Milan se fa pr\u00e8st a cuntalla su. Donca, torn\u00e8mm indree e and\u00e8mm in regola e a pian, che chii va pian va san e va l\u00f2ntan, se de no non f\u00e8mm che de la confusion.
\nL\u2019\u00e8 vera o no? Intanta a Firenze, in del 1265, nass Dante Alighieri, el Gran Poeta che, a so temp, cont la soa Divina Commedia, el ghe d\u00e0 a tucc qu\u00e8ll che ghe sp\u00e8tta e, segond i so merit, je manda senza tanti compiiment a l\u2019Inferno, al Purgatori e in Paradis. Ottone Arciv\u00e8scov che l\u2019era on gran politegon e padron, come se usa a di, de la melonera, el sostituiss al Carroccio el stendard de S. Ambroeus, el tr\u00e0 gi\u00f2
\nCast\u00e8ll Seprio che l\u2019era el covo di rib\u00e8lli e i avanz di
\nTorriani je obbliga a confinass nel Friuli. El riforma, come\u2019l voeur lu, i statutt, ‘e circa dusent femilii el ghe d\u00e0 l\u2019ordin Patrizio poeu el desfa \u201cle quattro Credenze\u201d e el ghe picca el so bravo tribunal. Credii minga che Ottone el fas\u00e8ss tutt stii b\u00e8i robb chi per amor de la patria! Ma nanca per sogn!… Je faseva per lu e per la soa famiglia.
\nBasta di che tutt qu\u00e8ll che conquisteven i Arciv\u00e8scov, che gh\u2019era staa prima de lu andava alla gesa, ma Ottone da qu\u00e8ll\u2019or\u00e8ggia l\u00ec el ghe sentiva minga e tutt l\u2019era… onorato per\u2019lu e per el so nevod Matteo per el qual el gh\u2019aveva on debol. Bisogna regordass che da Desio i Torriani o Della Torre eren minga staa casciaa via tucc. Cassone, che l\u2019era fioeu de Nepo e on cavalier in gamba, el se trovava a Cant\u00f9 dove l\u2019er\u00e0 staa mandaa da so pader e, app\u00e8na savuu la soa fin, el giura de vendicass e l\u2019era anca uman, e cont di todesch che l\u2019aveva poduu v\u00e8gh da l\u2019Imperator, el ghe fa gu\u00e8rra a Ottone e tanti volt ghe la fada d\u00ec. Ona nott a Gorgonzoeula, dove gh\u2019era minga nancam\u00f2 Sindegh… Gioacchino Finocchi, n\u00e8 el famoso carabinier
\nPin\u00e8lla, Cassone el troeuva el v\u00e8gg Arciv\u00e8scov a la t\u00e8sta de la soa milizia e ghe la disp\u00e8rd. L\u2019Arciv\u00e8scov el pensa ben de scondes in d\u2019on campanin e nissun ghe ven in ment de and\u00e0 a scovall se de no Ottone la pacciava fr\u00e8ggia. Le resistenza de
\nCassone per vendic\u00e0 so pader la dura fina a la metaa del 1281, ma a Vaprio v\u00e8n desfaa el so es\u00e8rcit e lu st\u00e8ss el ghe lassa la p\u00e8ll. Ottone el fa eleg capitani di milanes Guglielmo di
\nMonferrato, ma chii gh\u2019\u00e8 in dif\u00e8tt gh\u2019\u00e8 in sosp\u00e8tt, insc\u00ec Ottone el comencia a dubit\u00e0 de lu e on b\u00e8ll d\u00ec, e cio\u00e8 el duu Gennar 1283,\u00a0 intanta che Guglielmo l\u2019\u00e8 foeura de Milan, Ottone b\u00e8ll e v\u00e8gg come l\u2019era, perch\u00e8 i settanta je vedeva p\u00f9, el se m\u00e8tt e la t\u00e8sta di s\u00f2 soldaa, el cascia foeura de Milan tutt i ufficiai de Guglielmo e a lu el ghe imponn de m\u00e8tt p\u00f9 pee in cittaa. Guglielmo che l\u2019era staa per des ann Signore de Comm, el se fa amis di nemis de l\u2019Arciv\u00e8scov e el lassa che faghen scapp\u00e0 Guido Torriani che l\u2019era vun di trii presonee ancam\u00f2 viv in del Baradell. App\u00e8na Guido l\u2019\u00e8 liber, el tacca e fagh gu\u00e8rra a Ottone che la dura duu ann. Dopo se firma ona specie de paas che la finiss a port\u00e0 on\u2019altra gu\u00e8rra.
\nQttone el tocca i vottant ann e se capiss come a qu\u00e8lla t\u00e8nera et\u00e0a se poda minga tropp govern\u00e0; el pensa ben de ciam\u00e0 el pronipote Matteo Viscont de trentas\u00e8tt ann, favorevolment cognossuu per intelligenza e valor. Faa capitani del popol in del 1287 el ten el grado per tanti ann. Ottone, che l\u2019era arrivaa a la bell\u00e8zza de vottantott\u2019 ann, el moeur lamentandes coi dottor, che ghe faseven corona intorna al l\u00e8tt, col digh che eren b\u00e8sti perch\u00e8 eren minga bon de tegnill al mond. Malgrado el so grand dispias\u00e8 de lass\u00e0 sta vita e forsi cont el desideri de fa cr\u00e8pp\u00e0 i dottor che eren minga staa bon de fall guar\u00ec, Ottone Visconti el rend l\u2019anima a Dio che l\u2019ha de av\u00e8lla trovada minga c\u00e8rt… n\u00e8tta de bugada.<\/p>\n","protected":false},"excerpt":{"rendered":"
il milanese usato in questa pagina risale all\u2019inizio del XX\u00b0 secolo Ottone el molla minga el mazz, el cerca de vendicass de v\u00e8ss staa casciaa via da la rocca de Arona e de av\u00e8 ciappaa la p\u00e8ttenada a Angera, su\u2019l Lagh Maggior, dai milanes. Ottone el cova el velen in l\u2019anima, el tira a pr\u00e8ss\u2026<\/p>\n","protected":false},"author":1,"featured_media":0,"comment_status":"closed","ping_status":"closed","sticky":false,"template":"","format":"standard","meta":{"footnotes":""},"categories":[25],"tags":[],"class_list":["post-2806","post","type-post","status-publish","format-standard","hentry","category-meneghino"],"yoast_head":"