il milanese usato in questa pagina risale all\u2019inizio del XX\u00b0 secolo<\/p>\n
El ciappa el post del Galeazz so fioeu, Gian Galeazz Conte di Virt\u00f9, che essend r\u00e8staa vedov de Isab\u00e8lla, el sposa soa cusina
\nCaterina, tosa del Bernab\u00f2 e de la Regina de la Scala. Gian Galeazz l\u2019era on furbon matricolaa, el faseva, come se dis, la monegh\u00e8lla falsa, on ver basapili, semper coi oeucc rivolt al ciel e i man in l\u2019acqua santa, el cantava in di cori coi fraa, el v\u00e8stiva mod\u00e8stament, el faseva di gran caritaa, el mortificava el corp, ma tutt per tir\u00e0 l\u2019acqua al so mulin… e come l\u2019ha savuu tiralla ben! El popol l\u2019ha creduu nientemen che on sant tant l\u2019\u00e8 staa bon de fa el gesuita e dagh a tucc el fumm in di oeucc. Ajut\u00e0 el succ\u00e8ss del nevod, l\u2019\u00e8 staa el zio, perch\u00e9 intanta che Gian Galeazz el cantava in di c\u00f2ri,
\nBernab\u00f2 el seguitava, per nag\u00f2tta, a fa tortur\u00e0, m\u00e8tt al rogo o sar\u00e0 in di gabbi de f\u00e8rr in compagnia di cinghiai rabbios o avvelenaa… e via discorrend, tucc quij pover crist che ghe borlava in di ong. Andand avanti vedar\u00e8mm che anca el nevod l\u2019\u00e8 d\u00e8gn del zio. Bernab\u00f2 Viscont, che l\u2019era l\u2019omm pussee discol, intemperant, cattiv e sfacciaa che ghe fuss staa su la madre t\u00e8rra, el gh\u2019aveva ona passion matta per la caccia e per conseguenza el gh\u2019aveva i so sit de caccia riservada. Se on quaivun el gh\u2019av\u00e8ss mazzaa ona legora o ona quaja, qu\u00e8ll l\u2019era sicur, pover diavol, de and\u00e0 drizz su la forca e tutt i beni, se ghe n\u2019aveva, eren confiscaa. A differenza di alter cacciator inveci de duu o trii can, lu ghe n\u2019aveva la bell\u00e8zza de cinqu mila e je tegneva part in S. Giovanni in Conca, in la cos\u00ec d\u00e8tta c\u00e0 di can, e part in campagna e quij pover diavol che ghe vegneven daa in custodia doveven viv semper cont la tremar\u00e8lla adoss. S\u00ec perch\u00e8 se on can el diventava, magher la colpa l\u2019era del custod, el qual senza tanti compiiment l\u2019era spogliaa de tutt; viceversa, se\u2019l can el vegneva via polit, el custod el gh\u2019aveva el toeu e poeu toeu. E guai se quaigheduu vorrev\u00e0 m\u00e8tt denter el nas… Basta di che duu pover Francescan che s\u2019eren perm\u00e8ss de digh a Bernab\u00f2 de vess on poo pussee uman, lu i ha faa subit brus\u00e0 viv. El b\u00e8ll l\u2019\u00e8 che\u2019l se ostinava a di che lu l\u2019era el cristian pussee divot! L\u2019\u00e8 vera che\u2019l faseva d\u00ec di m\u00e8ss che lu el sentiva immancabilment, ma in l\u2019ist\u00e8ss temp l\u2019insultava el
\nPapa, i V\u00e8scov e i pret le m\u00e8tteva sotta ai pee adrittura.
\nAi convent el ghe dava di beni, s\u00ec… ma eren qu\u00e8i che lu el confiscava ai alter per\u00f2! In del 1384 moeur Regina de la Scala, miee del Bernab\u00f2, l\u2019unica che gh\u2019aveva su de lu on poo diroo cos\u00ec d\u2019impero, e che l\u2019era bona de calm\u00e0 on ciccinin i so impeti de collera.
\nGuai se la fuss stada voeuna de ‘soffi\u00e0 su\u2019l foeugh’ inveci de m\u00e8tt acqua! Se a Bernab\u00f2 ghe sia dispiasuu de la mort de soa miee o se inveci el fuss content per av\u00e8gh p\u00f9 chii cercava de m\u00e8ttegh on quai freno ai s\u00f2 birbonad, mi savaria minga divel. I milanes, de sta princip\u00e8ssa, g\u2019hann ona memoria in del Teater de la Scala che\u2019l porta el so nomm e per v\u00e8ss staa fabbrica\u00f2 propi in del post dove gh\u2019era la gesa de S. Maria de la Scala fondada e dotada da lee. Ma del Teater de la Scala me ris\u00e8rvi de parlaven pussee avanti.
\nGian Galeazz, come hoo gi\u00e0 ditt, l\u2019era on finton de prima forza e se ne stava a Pavia cercand la manera de v\u00e8gh in di sciamp tutt el Staat. El fing on viagg a la Madonna del Mont, che, come tucc s\u00e8mm, l\u2019\u00e8 visin a Vares per fa on voto e de bon nevod, l\u2019avv\u00e8rt el zio Bernab\u00f2, scusandes che per la pr\u00e8ssa el podeva minga vegn\u00ec in cittaa a saludall, ma che l\u2019avaria veduu insc\u00ec tanto volontera se\u2019l gh\u2019aveva la bontaa de trovass, ven stabilii el sit dove poden ved\u00e8ss. Inf\u00e0tti la mattina fissada, Gian Galeazz el ven a Porta Cines cont on gran seguit de gent armada e par che\u2019l voeubbia dislengu\u00e0 da la consolazion quand el ved e vegnigh incontra duu, fioeu del Bernab\u00f2 mandaa dai pader che, a cavall d\u2019ona mula e scortaa da d\u00f2 guardi del so seguit, le sp\u00e8cciava su\u2019l pont de S.
\nVittor. App\u00e8na s\u2019hinn vist gh\u2019era p\u00f9 nissun che je tegneva.
\nBrascia su de chi, basa su de la… insomma ona roba commovent, ma dopo tutt i salamel\u00e8cch, Gian Galeazz el ghe d\u00e0 l\u2019ordin in tedesch a duu so ufficiai, de arr\u00e8st\u00e0 el zio. Ditt e fatt, circonden
\nBernab\u00f2 e i so fioeu, i disarmen, e faa presonee v\u00e8gnen, pussee che impr\u00e8ssa, portaa al Cast\u00e8ll de Porta Giovia, intanta che Bernab\u00f2 e i so fioeu dann foeura de malad\u00e8tt, minacciand e vosand al tradiment. Gian Galeazz se ne infischia, el lassa che vosen e strillen e content come ‘na Pasqua che\u2019l colp l\u2019era andaa ben, l\u2019entra trionfalment in Milan fra i evviva del popol che l\u2019acclama Signore Generale.
\nAi alter fioeu de Bernab\u00f2 non ghe r\u00e8stava che cerc\u00e0 de m\u00e8ttes al sicur e g\u2019hinn riussii. M\u00e8ttuu a post Bernab\u00f2,
\nGian Galeazz, el perm\u00e8tt che se saccheggia i palazz del zio dove gh\u2019era raccolt ona gran quantitaa de ricch\u00e8zz e in l\u2019ist\u00e8ss temp ghe se arrend el Cast\u00e8ll de S. Nazzar e la torr de Porta Romana.
\nGian Galeazz, fint semper pussee de Giuda, el mand\u00e0 a tutt i cort di regnant on manif\u00e8st, corredaa da c\u00e8rti proc\u00e8ss fals, dove se descriveva tutt i balossad de Bernab\u00f2 e di so fioeu, aggiungend che\u2019l tradii l\u2019era staa lu e minga el Bernab\u00f2 e che se l\u2019aveva faa presonee so zio e i cusin, l\u2019\u00e8 staa per la soa difesa personal, perch\u00e8 ghe l\u2019aveven giurada. Bernab\u00f2 l\u2019\u00e8 poeu staa mandaa al Cast\u00e8ll de Tr\u00e8zz, sta faa fabbricaa propi da lu, e che mai p\u00f9 el se saria immaginaa c\u2019he on b\u00e8ll d\u00ec l\u2019avarien saraa denter lu per fagh espi\u00e0 i so p\u00e8ccaa. Bernab\u00f2 el moeur, tant per cambi\u00e0, anca lu avvelenaa a settantases ann, in del 1385, lassand indree la bell\u00e8zza de trentases fioeu tra legittim e naturai. Se p\u00f2 immagin\u00e0 el… dolor de qu\u00e8ll car nevodin, che l\u2019ha piangiuu la mort de so zio come pocch nevod piangen.
\nEl g\u2019ha faa di funerai straordinari e la faa m\u00e8tt in dona tomba de marmo in gesa de S. Giovann in Conca. Quanta bontaa d\u2019anim!. -. E che coeur… el gh\u2019aveva qu\u00e8ll Gian Galeazzo Visconti!… La soa potenza e la soa politica. g\u2019hann assicuraa, minga dom\u00e0 qu\u00e8ll che\u2019l gh\u2019aveva giam\u00f2, ma ghe l\u2019hann ingrandii e aumentaa. Scomm\u00e8tti che tanti se domandarann come mai tanti princip che hann sposaa i tosann de Bernab\u00f2 hinn minga staa bon de uniss ai fioeu e and\u00e0 contra al Gian Gaieazz e fagh pag\u00e0 car qu\u00e8ll vil tradiment? Hann minga mancaa de fall, ma santo Dio!… se trattava, dopo tutt, de vendic\u00e0 on tiranno de la peggior specie e che la soa mort l\u00e0 ghe perm\u00e8tteva a tucc de tir\u00e0 el fiaa! L\u2019era anca giusta che se la ciappassen minga calda!\u00a0 E Gian Galeazz, cont la soa arte raffinada de fing, el saveva conquistass i simpatij de la popolazion; l\u2019ha subit diminu\u00ec i gab\u00e8ll, el g\u2019ha ridaa i privileg che Bernab\u00f2 el gh\u2019aveva tolt, l\u2019ha tiraa via tutt i abusi e l\u2019amministrava anca cont ona c\u00e8rta giustizia e imparzialitaa. C\u00e8rt, che l\u2019era ambiziosissim e che\u2019l ghe tegneva molto a l\u2019immortalitaa, e a provall bastaria el Domm de Milan e, la Certosa de Pavia che lu l\u2019ha ordinaa de erig in del 1386. Per qu\u00e8ll che riguarda el Domm, ghe n\u00e8 de qu\u00e8i che… tra\u2019l s\u00ec el no… hinn de parer contrari. Ma ne parlar\u00e8mm dopo. Continoa per\u00f2 i gu\u00e8rr e semper per la sfrenada ambizion de Gian Galeazz. In del
\n1387 el fa alleanza coi Da Carrara e cont i Signori de Padova per and\u00e0 contra al Signore de Verona che\u2019l ven sconfitt, r\u00e8stand a Gian Galeazz i so domini che p\u00e8r\u00f2 el doveva spart\u00ec coi Da Carrara che, giustament, pretendeven la soa part, come era staa stabilii; ma Gian
\nGaleazz el ghe d\u00e0 nanca a tr\u00e0, e siccome el v\u00e8gg Da’
\nCarrara l\u2019andava adree a alz\u00e0 la vos, le ciappa e le fa m\u00e8tt in del Forno de Monza e le lassa cr\u00e8pp\u00e0. El gh\u2019aveva on gran bon coeur anca lu, vedii! In del 1389, l\u2019unica tosa de Gian Galeazz, Valentina, la va in, Francia, sposa al frad\u00e8ll de qu\u00e8ll Re l\u00e0, cont ona dote che non ve soo di e per gionta el ghe d\u00e0 anca la cittaa de Asti e alter t\u00e8rr e cast\u00e8i del Piemont. Ma el pussee content de tucc l\u2019\u00e8 staa el popol che l\u2019ha dovuu pens\u00e0 lu a fa i spes del matrimoni. Insc\u00ec Gian Galeazz el gh\u2019aveva daa ai frances la ciav per pod\u00e8 d\u00e8rv\u00ec la porta e vegn\u00ec in c\u00e0 nostra. E qu\u00e8lla porta la ven infatti d\u00e8rvida in del 1391 dal Cont de Armagnac, parent de Bernab\u00f2, che cont di forz considerevol el ven a fagh la gu\u00e8rra a Gian Galeazz, el qual el comencia a sentiss a trem\u00e0 el bamborin. A tirall foeura d\u2019imbarazz ghe pensa Jacopo Dal Verme, on capitani coi fiocch, che cont ona bona scorta el va in Alessandria a sp\u00e8tt\u00e0 che v\u00e8gna el scior Armagnac per tajagh la strada. El ven, el scior Armagnac, e siccome i frances hinn semper staa fanfaroni e spavald come fussen staa lor a invent\u00e0 el fumm de ras, app\u00e8na l\u2019entra in Alessandria coi so soldaa e smontaa de cavall, tucc se m\u00e8tten a vos\u00e0: Foeura! Foeura, lombardi vigliacchi! E siccome i lombardi hinn mai staa vigliacchi ai so d\u00ec hinn vegnuu foeura e g\u2019hann daa ona tal mastegada de lassagh el s\u00e8gn, e l\u2019\u00e8 stada ben dada. Di frances, ona part hinn staa massacraa e ona part faa presonee compres el scior Armagnac che, vegnuu per son\u00e0, l\u2019\u00e8 staa sonaa in piena regola. Siccome a istig\u00e0 i frances de vegn\u00ec gi\u00f2 eren ‘staa i fiorentin gelos de la potenza di
\nViscont, insc\u00ec el capitani Dal Verme l\u2019ha pensaa ben de and\u00e0 a dagh el r\u00e8st ai toscani e ghe l\u2019ha daa de malad\u00e8tt. Gian
\nGaleazz, s\u00e8mper per la soa ambizion senza limit, ghe bastava minga i titol de Signore di Milano e de Conte della Virt\u00f9, el vorreva v\u00e8ss Duca e per av\u00e8gh on tal titol gh\u2019\u00e8 toccaa comprall da Venceslao, Imperator, cont cent mila fiorin d\u2019or e par che\u2019l gh\u2019abbia faa propi el ristr\u00e8tt, e l\u2019\u00e8 staa investii, come vassallo imperial, da vinticinqu cittaa. E qu\u00e8st el succed in del 1395. Parl\u00e8mm poeu no de la solennitaa de la cerimonia de quand g\u2019hann daa el manto e i ins\u00e8gn Ducai ! Basta di che gh\u2019era tutt i V\u00e8scov e tutt i ambasciator di potenz d\u2019Italia. I spes, se capiss, i ha pagaa pantalon.
\nQuanti famili hinn andaa in rovina per la manera indecente che vegneven continoament mongiuu! Siccome poeu l\u2019apetitt el ven mangiand, se capiss come de venticinqu cittaa ghe n\u2019av\u00e8ss minga assee. El pensa de compr\u00e0
\nPisa per dusent mila fiorin e chii ghe l\u2019ha venduda l\u2019\u00e8 staa Gerardo
\nAppiani, che l\u2019era succeduu al pader in qu\u00e8ll domini. Siena inveci la se d\u00e0 a lu spontaneament e per m\u00e8zzo di so generai el ven a v\u00e8gh anca tutta la Lunigiana. Ma l\u2019era minga content nancam\u00f2!
\nSigura de no! Tant \u00e8 vera che\u2019l g\u2019ha daa, el g\u2019ha daa… fina che l\u2019ha poduu v\u00e8gh: Perugia, Assisi, Nocera e Spoleto. Per favela curta, de venticinqu cittaa l\u2019\u00e8 diventaa padron de trentacinqu e cio\u00e8:
\nMilan, Bergom, Brescia, Comm, Bormio, Novara, Vercelli, Alessandria, Tortona,
\nCasal, Bobbio, Valenza, Pavia, Lod, Crema, Cremona, Reggio, Borgo San Donnino,
\nVerona, Vicenza, Feltre, Belluno, Perugia, Arezzo, Nocera, Assisi, Spoleto,
\nSiena, Pisa, Pontremoli, Carrara, Sarzana, Parma, Piacenza e Bologna, e scusee s\u2019hinn pocch. E propi quand l\u2019era adree a m\u00e8ttes in coo la corona d\u2019Italia Gian Galeazz el moeur a Melegnan al trii de Settember del
\n1402. Lu che\u2019l gh\u2019aveva insc\u00ec paura de la p\u00e8ste, per combinazion l\u2019ha incominciaa’ a infier\u00ec in del 1398 e l\u2019ha propi dovuu mor\u00ec de qu\u00e8lla. Se veurom v\u00e8ss giust, devom confess\u00e0 che, malgrado tutt, sto Duca l\u2019ha tentaa ogni m\u00e8zzo per port\u00e0 la patria a on grado straordinari de florid\u00e8zza perch\u00e8 oltre al Domm e la Certosa, ghe se dev a lu di canai per la fertilita\u00e0 de la campagna, ona Biblioteca e on\u2019Accademia de Scoltura e Pittura a Pavia.<\/p>\n","protected":false},"excerpt":{"rendered":"
il milanese usato in questa pagina risale all\u2019inizio del XX\u00b0 secolo El ciappa el post del Galeazz so fioeu, Gian Galeazz Conte di Virt\u00f9, che essend r\u00e8staa vedov de Isab\u00e8lla, el sposa soa cusina Caterina, tosa del Bernab\u00f2 e de la Regina de la Scala. Gian Galeazz l\u2019era on furbon matricolaa, el faseva, come se\u2026<\/p>\n","protected":false},"author":1,"featured_media":0,"comment_status":"closed","ping_status":"closed","sticky":false,"template":"","format":"standard","meta":{"footnotes":""},"categories":[25],"tags":[],"class_list":["post-2811","post","type-post","status-publish","format-standard","hentry","category-meneghino"],"yoast_head":"